Watan goragçylarynyň güni

Hormatly Watan goragçylary!
Sizi «Pähim-paýhas ummany Magtymguly Pyragy» ýylynyň ilkinji günlerinde bellenilýän Watan goragçylarynyň güni mynasybetli tüýs ýürekden gutlaýaryn. Bu baýramyň giňden bellenilmegi ata Watanymyzyň mukaddes Garaşsyzlygyny, özygtyýarlylygyny, çäk bitewüligini, konstitusion gurluşyny, döwlet serhedimiziň mizemezligini goraýan, ýurdumyzyň howpsuzlygyny we jemgyýetçilik asudalygyny, milli kanunçylygymyzy, hukuk tertibini üpjün edýän harby we hukuk goraýjy edaralaryň harby gullukçylaryna, işgärlerine uly ynam bildirilýändigine hem-de olar hakynda yzygiderli alada edilýändigine şaýatlyk edýär.

Garaşsyz Türkmenistanyň merdana gerçekleri!
2024-nji ýylda halkymyz Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygyny uludan toýlaýar. Şunuň bilen baglylykda, şu ýyl ýurdumyzda beýik şahyryň watançylyk, gahrymançylyk, agzybirlik taglymlaryny, döredijiliginiň nesilleri terbiýelemekdäki ähmiýetini giňden wagyz etmäge gönükdirilen giň gerimli işler alnyp barlar. Bu işler akyldar şahyrymyzyň watanperwerlige çagyrýan gymmatly eserlerini äleme ýaýmakda wajyp ähmiýete eýe bolar. Şeýle döwletli işleri dabaralandyrmak, nusgawy şahyrymyzyň baý döredijilik mirasyny arşa götermek maksady bilen, biz 2024-nji ýyly «Pähim-paýhas ummany Magtymguly Pyragy» ýyly diýip atlandyrdyk. Bu ýylda biziň öňümizde şahyryň döredijilik mirasyny, watançylyk hem-de öwüt-nesihat mazmunly şygyrlaryny ýaşlaryň arasynda giňden düşündirmek, ýaş watançylary beýik şahyryň paýhasly setirleri arkaly terbiýelemek ýaly möhüm wezipeler durýar.

Merdana Watan goragçylary!
Siz mukaddes Garaşsyzlygymyzyň 32 ýyllyk baýramy mynasybetli geçirilen dabaraly harby ýörişden buýsançly gadamlar bilen geçip, döwlet Garaşsyzlygymyzy goramaga hemişe taýýardygyňyzy aýdyň görkezdiňiz. Milli goşunymyzyň goranmak ukybyny, söweşjeň kuwwatyny we Garaşsyzlyk ýyllary içinde ýeten belent derejesini dünýä jemgyýetçiligine äşgär etdiňiz. Siz geljekde-de Watany goramak borjuny ähli zatdan belent tutup, harby bilimiň we sungatyň gazananlaryny birkemsiz özleşdirmelisiňiz. Watansöýüjiligiňiz, kasama hem-de harby borja wepalylygyňyz bilen uly at-abraýa, belent mertebä mynasyp bolmalysyňyz.

Eziz Watanymyzyň edermen ogullary!
Bu Watan mertleriň Watanydyr! Siz bolsa şu topragyň gerçek ogullarysyňyz. Eziz Watanymyzyň dünýäde parahatçylygy we howpsuzlygy pugtalandyrmaga gönükdirilen daşary syýasatyna hem-de oňyn Bitaraplyk hukuk ýagdaýyna esaslanýan, ýurdumyzyň harby howpsuzlygyny, çäkleriniň bitewüligini üpjün etmegiň esaslaryny kesgitleýän Harby doktrinamyzyň ýörelgelerine berk eýermek siziň her biriňiz üçin mukaddes borç bolmalydyr. Siz döwletimiziň Garaşsyzlygyny, hemişelik Bitaraplygyny, konstitusion gurluşyny, milli gymmatlyklarymyzy goramak, jemgyýetimizde hukuk tertibini pugtalandyrmak, kanunçylygy has-da berkitmek ýaly belent maksatlardan ugur almalysyňyz. Döwrebap harby tehnikalara we enjamlara erk etmek başarnygyny birkemsiz ele alyp, parasatly pederlerimiziň mertlik mekdebini, harby sungatyny kämilleşdirmelisiňiz. Ata-babalarymyzyň adalatlylyk, parasatlylyk, mertlik, watansöýüjilik ýaly belent häsiýetlerini nusga edinip, ýurdumyzyň bedew batly ösüşlerine saldamly goşant goşmalysyňyz.

Gaýratly ogullar Watanyň daýanjydyr! Siziň Watany goramakda gaýrat görkezip, Türkmenistanyň Garaşsyzlygyny, dünýä bileleşigi tarapyndan ykrar edilen hemişelik Bitaraplyk hukuk ýagdaýyny, milli gymmatlyklarymyzy goramak ýaly belent borçlara wepaly boljakdygyňyza, gerek bolsa, bu mukaddeslikler üçin şirin janyňyzy hem gaýgyrmajakdygyňyza berk ynanýaryn.

Watanymyzyň wepaly ogullary!
Garaşsyzlyk ýyllary içinde milli Ýaragly Güýçlerimiz kämilleşip, kuwwatly goşuna öwrüldi. Häzirki wagtda döwletimiz Watan goragçylarynyň hem-de olaryň maşgala agzalarynyň ýaşaýyş-durmuş, gulluk we iş şertlerini gowulandyrmagy hemişe üns merkezinde saklaýar. Şunuň bilen baglylykda, Milli goşunymyz kämil söweşjeň ýaraglar, harby tehnikalar, sanly ulgamyň mümkinçilikleri bilen yzygiderli üpjün edilýär. Ýurdumyzyň harby we hukuk goraýjy edaralarynyň maddy-enjamlaýyn binýadyny öňküden-de döwrebaplaşdyrmak, Watan goragçylarynyň gulluk etmegi, dynç almagy üçin has oňaýly şertleri döretmek «Pähim-paýhas ummany Magtymguly Pyragy» ýylynda hem Türkmenistanyň döwlet syýasatynyň we amala aşyrýan harby özgertmeleriniň ileri tutulýan ugurlarynyň biri bolar.

Hormatly Watan goragçylary!
Sizi Watan goragçylarynyň güni bilen ýene-de bir gezek tüýs ýürekden gutlaýaryn. Siziň ähliňize berk jan saglyk, uzak ömür, egsilmez bagt, bagtyýar durmuş, mukaddes we jogapkärli gullugyňyzda hem-de işiňizde uly üstünlikleri arzuw edýärin.

Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy Serdar Berdimuhamedow.